भारतीय महिला संघाला सलाम! आशिया कपच्या झगमगाटापासून आशियाई क्रीडा स्पर्धा २०२६ मधील सुवर्णझळाळीपर्यंत, कप्तान कौर आणि वुमन इन ब्लूने आपली विजयी घोडदौड नव्या भूमीवरही कायम ठेवली. नुकताच ‘क्वीन्स ऑफ आशिया’चा मुकुट पटकावल्यानंतर... भारतीय संघाचं आणखी एक ध्येय बाकी होतं आणि यावेळी मंच होता जपानचा. आव्हान वेगळं होतं — नवा देश, अपरिचित परिस्थिती; पण या संघाने नेहमीप्रमाणेच प्रत्येक वेळी शंभर टक्क्यांहून अधिक योगदान दिलं. मैदानावर पाऊल ठेवल्यापासून ध्येय अगदी स्पष्ट होतं... लढायचं, जिंकायचं आणि आणखी एक पदक मायदेशी आणायचं. भारताने २०२३ आणि २०२६ अशा सलग दोन आशियाई क्रीडा स्पर्धांमध्ये सुवर्णपदक पटकावत संपूर्ण देशाची मान अभिमानाने उंचावली.

काय शानदार विजय आणि काय दिमाखात जिंकलेलं सुवर्णपदक! जपानमध्ये झालेल्या अंतिम सामन्यात भारताने श्रीलंकेचा तब्बल १४७ धावांनी पराभव केला. श्रीलंकेने यापूर्वी २०२४ आशिया कपच्या अंतिम सामन्यात भारताला पराभूत केलं होतं, मात्र त्यानंतर भारतीय महिला संघाने त्यांच्याविरुद्ध सलग आठ टी२० आंतरराष्ट्रीय सामने जिंकले आहेत. स्मृती मानधनाच्या ७९ (४५), शेफाली वर्माच्या ४८ आणि रिचा घोषच्या नाबाद ४९ (२२) धावांच्या जोरावर भारताने २० षटकांत ३ बाद २१६ धावांचा विशाल डोंगर उभारला. प्रत्युत्तरात श्रीलंकेचा संघ १५.४ षटकांत अवघ्या ६९ धावांवर सर्वबाद झाला. दीप्ती शर्माने ६ धावांत ३ विकेट्स घेत शानदार कामगिरी केली.

प्रत्येक सामन्यात संपूर्ण संघाची एकजूट दिसून आली. गोलंदाजांनी एकत्रितपणे प्रतिस्पर्ध्यांवर दबाव टाकला, फलंदाजांनी मोकळेपणाने आक्रमण केलं आणि युवा खेळाडूंनी कोणत्याही भीतीशिवाय जबाबदारी स्वीकारत पुढाकार घेतला. एवढ्या मोठ्या मंचावर खेळताना दबाव असतोच आणि मायदेशातील अब्जावधी चाहत्यांच्या अपेक्षांचं ओझंही असतं. पण भारतीय महिला संघाने हे सगळं स्वीकारलं आणि स्वतःवर तसेच एकमेकींवर विश्वास ठेवला. प्रत्येक चौकारासोबत जल्लोष वाढत गेला, प्रत्येक विकेटने संघाला ध्येयाच्या आणखी जवळ नेलं आणि प्रत्येक विजयाने या अविस्मरणीय प्रवासात आणखी एक खास अध्याय जोडला.

याआधी भारताने निशिन येथे जपानविरुद्धच्या उपांत्यपूर्व फेरीत आठ विकेट्सने विजय मिळवत आपल्या आशियाई क्रीडा स्पर्धेतील मोहिमेला सुरुवात केली होती. भारताने ५८ धावांचं लक्ष्य सहज पार केलं. श्री चरणीने चार षटकांत अवघ्या १० धावा देत चार विकेट्स घेत गोलंदाजीत कमाल केली, तर शेफाली वर्माने १५ चेंडूंमध्ये नाबाद ४० धावा फटकावल्या. त्यानंतर उपांत्य फेरीत भारताने बांगलादेशवर तब्बल ११४ धावांनी विजय मिळवला. शेफालीसाठी हा दिवस आणखी खास ठरला. तिने व्हाइट-बॉल आंतरराष्ट्रीय क्रिकेटमधील आपलं पहिलं शतक झळकावत आशियाई क्रीडा स्पर्धेत शतक करणारी पहिली खेळाडू होण्याचा मान मिळवला. तिने ४९ चेंडूंमध्ये तीन चौकार आणि नऊ षटकारांसह नाबाद १०० धावा फटकावल्या. तिचा स्ट्राइक रेट होता २०४.०८. आपल्या हरमनप्रीत कौरनेही मोलाच्या ४० धावांचं योगदान दिलं. शर्मा गर्ल्स — नंदिनी आणि दीप्ती — यांनी प्रत्येकी तीन विकेट्स घेत विजयात महत्त्वाची भूमिका बजावली.

जिद्दीपासून गौरवापर्यंत, भारताने प्रत्येक सामन्यात आपल्या खास अंदाजात खेळत सर्वत्र ब्लू छाप सोडली. प्रत्येक धावेसोबत आणि प्रत्येक जल्लोषासोबत आपल्या मुलींनी आपली उपस्थिती दणक्यात जाणवून दिली. इंडियाआआआ, इंडियाआआआ!