आंतरराष्ट्रीय एकदिवसीय सामन्यांच्या मालिकेत ३-० असा व्हाइटवॉश विजय प्राप्त केल्यानंतर भारतीय संघाला आता शुक्रवार दिनांक २९ जुलै रोजी सुरू होणाऱ्या पाच सामन्यांच्या टी२०आय मालिकेतही यजमान वेस्ट इंडिजच्या संघावर वर्चस्व निर्माण करण्याची अपेक्षा आहे. 

भारताचा व्हाइट बॉल कर्णधार रोहित शर्मा, विकेट कीपर ऋषभ पंत आणि ऑल राऊंडर हार्दिक पंड्या हे खेळाचा ताण कमी करण्यासाठी तीन सामन्यांच्या एकदिवसीय मालिकेत आराम करून पुन्हा टी२०आय संघात येणार आहेत. 

भारताचा स्टार ऑफ स्पिनर रवीचंद्रन अश्विन आणि चायनामॅन गोलंदाज कुलदीप यादव हे देखील टी२०आयच्या संघात आले आहेत. ऑस्ट्रेलियात ऑक्टोबर- नोव्हेंबरमध्ये खेळल्या जाणाऱ्या आयसीसी मेन्स टी२० वर्ल्ड कपच्या संघात सहभागाची त्यांना अपेक्षा आहे. 

भुवनेश्वर कुमार, दिनेश कार्तिक आणि हर्षल पटेल हे टी२० च्या संघातले इतर खेळाडूदेखील टी२०आय मालिकेपूर्वी त्रिनिदाद आणि टोबॅगोत आले आहेत. 

दरम्यान विराट कोहली, जसप्रीत बुमरा आणि युजवेंद्र चहल यांना पाच सामन्यांच्या टी२०आय मालिकेत आराम दिला गेला आहे. 

निकोलस पूरनच्या नेतृत्वाखालील वेस्ट इंडिजच्या संघाला टी२० आयच्या स्वरूपात उत्तम कामगिरीची अपेक्षा आहे. हा प्रकार त्यांच्या खेळाच्या स्टाइलसाठी उत्तम आहे. 

वेस्ट इंडिजने अलीकडेच झालेल्या एकदिवसीय आंतरराष्ट्रीय खेळात समाधानकारक कामगिरी केली नाही. परंतु या कॅरेबियन संघाने जुलै महिन्यात बांग्लादेशवर टी२०आय मालिकेत २-० ने विजय मिळवला आहे. 

कर्णधार निकोलस पूरन, ब्रँडन किंग, कायली मेयर्स, रोवमन पॉवेल आणि रोमारियो शेफर्ड यांच्या कामगिरीवर टी२०आय मालिकेचा विजय अवलंबून राहील. 

वेस्ट इंडिज आणि भारताचा एकमेकांविरूद्ध टी२०आय विजयाचा इतिहास 

भारताने कायमच टी२०आय स्वरूपात वेस्ट इंडिजविरूद्ध वर्चस्व गाजवले आहे. त्यांनी आतापर्यंत खेळलेल्या २० सामन्यांपैकी १३ सामने जिंकले आहेत. विंडीजने फक्त सहा विजय प्राप्त केले आणि एक सामना अनिर्णित राहिला. 

भारताने खेळाच्या या प्रकारात विंडीजवर चार सामन्यांचा निर्विवाद विजय प्राप्त केला आहे. 

या खेळाडूंवर लक्ष राहील 

विराट कोहलीच्या अनुपस्थितीत दीपक हूडा पाच टी२०आयमध्ये भारतासाठी तिसऱ्या क्रमांकावर फलंदाजी करू शकतो. या २७ वर्षीय खेळाडूने आतापर्यंतच्या आपल्या छोट्या टी२०आय करियरमध्ये चांगली कामगिरी केली आहे. त्याने सहा सामन्यांमध्ये ६८.३३ च्या सरासरीने आणणि १७२.२६ च्या स्ट्राइक रेटने २०५ धावा केल्या. या धमाकेदार फलंदाजाने नुकत्याच आयर्लंडविरूद्ध झालेल्या पहिल्या टी२०आय सामन्यात चमकदार कामगिरी केली असून कॅरेबियन आणि अमेरिकेतही हाच फॉर्म कायम ठेवेल अशी आशा आहे. 

वेस्ट इंडिजसाठी रोमारियो शेफर्ड हा लक्ष ठेवण्याजोगा खेळाडू असेल. गयानामध्ये जन्मलेल्या या ऑल राऊंडर खेळाडूने अलीकडेच बांग्लादेशविरूद्ध तीन सामन्यांच्या टी२०आय मालिकेत सर्वाधिक विकेट्स घेतल्या. त्याने ११.३३ च्या सरासरीने तीन सामन्यांत सहा विकेट्सची लयलूट केली. 

पहिली टी२०आय पाच सामन्यांची मालिका त्रिनिदादमधील ब्रायन लारा स्टेडियमवर खेळवली जाईल तर पुढील टी२०आय सामने सेंट किट्समध्ये वॉर्नर पार्कमध्ये खेळवले जातील.

भारत आणि वेस्ट इंडिजचे संघ त्यानंतर अमेरिकेला प्रवास करून जातील. शेवटचे दोन सामने फ्लोरिडामधील सेंट्रल ब्रोवर्ड रिजनल पार्क स्टेडियमवर खेळवले जातील. सामने भारतीय प्रमाणवेळेनुसार रात्री ८.०० वाजता सुरू होतील.