चेन्नईच्या एम. ए. चिदंबरम स्टेडियमवर टी-20 विश्वचषक 2026 च्या सुपर 8 सामन्यात भारताने झिम्बाब्वेचा 72 धावांनी पराभव केला. या विजयासह भारताने उपांत्य फेरीत प्रवेश केला आहे.

झिम्बाब्वेचा कर्णधार सिकंदर रझा याने नाणेफेक जिंकून प्रथम फलंदाजी करण्याचा निर्णय घेतला, परंतु भारतीय फलंदाजांनी त्याची योजना उधळून लावली. अभिषेक शर्मा आता फॉर्ममध्ये परतला असून त्याने 30 चेंडूत (4 चौकार, 4 षटकार) 55 धावा केल्या. हे टी-20 विश्वचषकातील त्याचे पहिले अर्धशतक होते.

सलामीवीर संजू सॅमसनने (24) आक्रमक सुरुवात केली परंतु तो लवकर बाद झाला. ईशान किशनने 24 चेंडूत 38 धावा केल्या. सूर्यकुमार यादवने 33 धावा केल्या.

सामन्याचा खरा थरार शेवटच्या ओव्हर्समध्ये दिसला. या वेळी हार्दिक पांड्याने नाबाद 50 धावा केल्या. त्याची खेळी पॉवर हिटिंग, फिनिशिंग आणि सामना जिंकण्याच्या जिद्दीने भारलेली होती.

तिलक वर्माने 16 चेंडूत 3 चौकार आणि 4 षटकारांसह नाबाद 44 धावा केल्या.  हार्दिक आणि तिलक यांच्या 84 धावांच्या भागीदारीमुळे भारताने 20 षटकांत 4 बाद 256 धावा केल्या.

टी20 आंतरराष्ट्रीय क्रिकेटमध्ये भारताची ही दुसरी सर्वोच्च धावसंख्या आहे.

झिम्बाब्वेसाठी रिचर्ड गारावा आणि ब्रॅड इव्हान्स महागडे ठरले.

लक्ष्याचा पाठलाग करताना झिम्बाब्वेने चांगली सुरुवात केली परंतु भारतीय गोलंदाजांनी लवकरच दबाव वाढवला. ब्रायन बेनेटने 97 धावांचा शानदार डाव खेळला, परंतु त्याचा एकट्याचा खेळ पुरेसा ठरला नाही. सिकंदर रझानेही 31 धावा केल्या.

अर्शदीप सिंगने 3/24 कामगिरी केली तर वरुण चक्रवर्तीने 1 विकेट घेतली.  झिम्बाब्वेला 20 ओव्हर्समध्ये 6 बाद 184 धावा करता आल्या.

संक्षिप्त स्कोअर

भारताकडून झिम्बाब्वेचा 72 धावांनी पराभव.

झिम्बाब्वेः 20 षटकांत 184/6  ब्रायन बेनेट 97*, सिकंदर रझा 31;  अर्शदीप सिंग 3/24 भारत 256/4 (20 षटके)  अभिषेक शर्मा 55, हार्दिक पांड्या 50*, तिलक वर्मा 44*, ईशान किशन 38