Mumbai Indians

इंडिया... इंडिया! बर्मिंगहॅमच्या एजबॅस्टन मैदानावर झालेल्या पहिल्या एकदिवसीय सामन्यात 'मेन इन ब्लू'ने इंग्लंडचा ६ विकेट्सने पराभव करत तीन सामन्यांच्या मालिकेत १-० अशी आघाडी घेतली. हा दिवस जसप्रीत बुमराहसाठी खास ठरला. त्याने आपल्या कारकिर्दीतील १५०वी एकदिवसीय विकेट मिळवली, तर सामनावीर अक्षर पटेलने फलंदाजी आणि गोलंदाजीतील अष्टपैलू कामगिरीने जगभरातील भारतीय चाहत्यांना आनंदाची भेट दिली.

गुरनूर, बुमराह आणि प्रसिद्धचा भेदक मारा

पहिल्या दहा षटकांत इंग्लंडने चांगली सुरुवात केली होती. मात्र, त्यानंतर भारताच्या गोलंदाजांनी सामन्याचे चित्र पालटले आणि इंग्लंडची अवस्था १६.४ षटकांत ८०/५ अशी झाली.

गुरनूर बरारने सलामीवीर जेकब बेथेल (१४) याला बाद करत पहिली भागीदारी मोडली. त्यानंतर शानदार लयीत फलंदाजी करणाऱ्या बेन डकेटलाही त्याने माघारी धाडले. सीमारेषेजवळ जसप्रीत बुमराहने अप्रतिम झेल घेत डकेटची ४३ धावांवरील खेळी संपवली. योग्यवेळी संतुलन राखत घेतलेला हा झेल सामन्याचा टर्निंग पॉइंट ठरला. गुरनूरने १३व्या षटकात दोन विकेट्स घेत इंग्लंडवर मोठा दबाव निर्माण केला.

बुमराहने आपल्या दुसऱ्या स्पेलमध्ये इंग्लंडचा कर्णधार हॅरी ब्रूक (१) याची महत्त्वाची विकेट घेतली. आत येणाऱ्या चेंडूचा अचूक अंदाज न आल्याने ब्रूकचा फटका पहिल्या स्लिपमध्ये उभ्या असलेल्या रो-हिटमन शर्माच्या हातात गेला. या विकेटसह बुमराहने एकदिवसीय क्रिकेटमधील १५० विकेट्सचा टप्पा गाठला. त्याने केवळ गोलंदाजीतच नव्हे तर क्षेत्ररक्षणातही उत्कृष्ट योगदान दिले. सीमारेषेजवळ धावा वाचवत त्याने संघासाठी मोलाची कामगिरी केली. बुमराहने ९ षटकांत १/३१ अशी किफायतशीर गोलंदाजी केली. त्याचा इकॉनॉमी रेट ३.४ होता.

प्रसिद्ध कृष्णानेही नव्या चेंडूच्या हालचालीचा अचूक फायदा घेत जोस बटलर आणि सॅम करन (१६.१ आणि १६.४ षटकांत) यांच्या महत्त्वाच्या विकेट्स घेतल्या. त्या वेळी इंग्लंडला मोठ्या भागीदारीची नितांत गरज होती.

दुबे-केएल राहुलची अप्रतिम जोडी, इंग्लंड १०७/६

इंग्लंडची भागीदारी आकार घेत असतानाच शिवम दुबेने विल जॅक्सला बाद करत भारताला महत्त्वाचे यश मिळवून दिले.

जॅक्सच्या बॅटची जाड कड लागून चेंडू यष्टिरक्षकाच्या दिशेने गेला. केएल राहुलने उजवीकडे झेपावत एका हाताने अप्रतिम झेल घेत सर्वांची वाहवा मिळवली.

अक्षरचे चार विकेट्स, डॉसन-रूट भागीदारीचा शेवट

लियाम डॉसन आणि जो रूट यांनी सुरुवातीला मिळालेल्या जीवदानाचा फायदा घेत सहाव्या विकेटसाठी १२१ धावांची महत्त्वपूर्ण भागीदारी केली.

अक्षर पटेलने ही भागीदारी मोडताना डॉसनला बाद केले. रोहित शर्माने संतुलन राखत उत्कृष्ट झेल घेतला. यानंतर अक्षरने जोफ्रा आर्चर (१२), आदिल रशीद (स्टंप आऊट) आणि जोश टंग यांनाही बाद केले. जो रूट मात्र नाबाद ७६ धावांवर राहिला. अक्षरने ९.५ षटकांत ४/६२ अशी प्रभावी गोलंदाजी केली. भारताच्या शिस्तबद्ध गोलंदाजीमुळे इंग्लंडचा डाव ४७.५ षटकांत २५८ धावांवर संपुष्टात आला.

गिलचे नेतृत्वपूर्ण फलंदाजी, वॉशिंग्टन-अक्षरची अर्धशतके

कर्णधार शुभमन गिलने उत्कृष्ट फलंदाजी करत भारताच्या धावांचा पाया रचला. मधल्या षटकांत त्याच्या आक्रमक फलंदाजीने सामन्याची दिशा भारताच्या बाजूने वळवली. त्याने उपकर्णधार श्रेयस अय्यर (३५) सोबत १०१ धावांची भागीदारी उभारली. गिल ७५ चेंडूंमध्ये ८० धावा करून दुखापतीमुळे निवृत्त झाला. त्याच्या खेळीत ११ चौकार आणि १ षटकार होता.

अक्षर पटेलचा दिवस खऱ्या अर्थाने संस्मरणीय ठरला. गोलंदाजीनंतर फलंदाजीतही त्याने चमक दाखवत ५२ चेंडूंमध्ये नाबाद ५७ धावा केल्या. त्याच्या खेळीत ५ चौकार आणि १ षटकार होता. दुसऱ्या बाजूला वॉशिंग्टन सुंदरनेही संयमी आणि महत्त्वपूर्ण खेळी करत ६३ चेंडूंमध्ये नाबाद ५२ धावा केल्या. या दोघांच्या नाबाद भागीदारीच्या जोरावर भारताने ४५.२ षटकांत ४ बाद २६२ धावा करत सामना ६ विकेट्सने जिंकला.

संक्षिप्त धावफलक

इंग्लंड: ४७.५ षटकांत सर्वबाद २५८ (जो रूट ७६, बेन डकेट ४३; अक्षर पटेल ४/६२)*

भारत: ४५.२ षटकांत २६२/४ (शुभमन गिल ८०, अक्षर पटेल ५७, वॉशिंग्टन सुंदर ५२*)*

निकाल: भारताचा ६ विकेट्सने विजय.