Mumbai Indians

प्लेयर ऑफ द मॅच शेफाली वर्माच्या दमदार ५५ धावा आणि स्मृती मानधनाच्या नाबाद ४७ धावांच्या शानदार खेळीच्या जोरावर भारताने झिम्बाब्वेवर नऊ विकेट्सने विजय मिळवला. रायपूरच्या शहीद वीर नारायण सिंह आंतरराष्ट्रीय स्टेडियमवर झालेल्या दुसऱ्या महिला टी२० सामन्यात भारतीय संघाने दणदणीत विजयाची नोंद केली.

पहिल्या १० षटकांत भारतीय गोलंदाजांचं वर्चस्व

भारतीय गोलंदाजांनी सुरुवातीपासूनच सामन्यावर पकड मजबूत केली. क्रांती गौड, नंदनी शर्मा आणि दीप्ती शर्मा यांनी प्रत्येकी एक विकेट घेत भारताला आघाडीवर आणलं. अचूक टप्पा आणि दिशा, गोलंदाजीतील हुशारीने केलेले बदल आणि सातत्याने निर्माण केलेला दबाव यामुळे झिम्बाब्वेच्या फलंदाजांना मोकळेपणाने फटकेबाजी करता आली नाही. तीन महत्त्वपूर्ण विकेट्स घेत भारतीय महिला संघाने धावगतीवरही नियंत्रण ठेवलं. १० षटकांअखेर झिम्बाब्वेची अवस्था ३ बाद ५१ अशी होती.

निकीच्या सलग दोन विकेट्सनी सामन्याचं चित्र पालटलं

निकी प्रसादने पुन्हा एकदा आपली चमक दाखवली. यावेळी गोलंदाजीत कमाल करत तिने सलग दोन विकेट्स घेतल्या आणि १४.२ षटकांत झिम्बाब्वेची अवस्था ५ बाद ७५ अशी केली. सर्वप्रथम तिने ३२ चेंडूंमध्ये ३४ धावा करणाऱ्या चिपो मुगेरी-तिरिपानोला बाद केलं. यष्टिरक्षक रिचा घोषने तिचा झेल टिपला. त्यानंतर निकीने न्याशा ग्वान्झुराला पायचीत करत दुसरी विकेट मिळवली. अवघ्या दोन षटकांत सात धावा देत दोन विकेट्स घेणाऱ्या निकीने मोक्याच्या क्षणी झिम्बाब्वेवरील दबाव आणखी वाढवला.

क्षेत्ररक्षणातही निकीने कमाल केली. सीमारेषेवरून धावत पुढे येत तिने झेप घेत जमिनीपासून अगदी काही इंचांवर अप्रतिम झेल टिपला आणि मिशेल मावुंगाला माघारी धाडलं.

नियमित अंतराने विकेट्स पडत राहिल्यामुळे झिम्बाब्वेला मोठी धावसंख्या उभारता आली नाही. कर्णधार जोसेफिन न्कोमोने शेवटपर्यंत नाबाद राहत २७ धावा केल्या. अखेर झिम्बाब्वेने २० षटकांत ८ बाद १०२ धावा केल्या.

शेफालीचं झंझावाती अर्धशतक, कर्णधार स्मृती-शेफालीच्या भागीदारीने भारताचा मालिका विजय निश्चित

सलामीवीर शेफाली वर्माने अवघ्या २५ चेंडूंमध्ये सहा चौकार आणि चार षटकारांसह तुफानी ५५ धावा फटकावत सुरुवातीपासूनच भारताला सामन्यावर वर्चस्व मिळवून दिलं. दुसऱ्या बाजूने स्मृती मानधनाने तिला उत्तम साथ दिली आणि दोघींनी मिळून सलामीसाठी ९६ धावांची भागीदारी रचली. सकारात्मक दृष्टिकोन आणि आक्रमक फलंदाजीमुळे भारतीय महिला संघाने संपूर्ण सामन्यात आपली पकड कायम ठेवली. कर्णधार स्मृतीने पुढाकार घेत २५ चेंडूंमध्ये नाबाद ४७ धावांची खेळी केली आणि षटकार ठोकत भारताच्या विजयावर शानदार शिक्कामोर्तब केलं.

भारताने अवघ्या ८.५ षटकांत १ बाद १०४ धावा करत लक्ष्य गाठलं आणि टी२० आंतरराष्ट्रीय क्रिकेटमधील सलग दहाव्या विजयाची नोंद केली.

संक्षिप्त धावफलक

झिम्बाब्वे: २० षटकांत ८ बाद १०२ (चिपो मुगेरी-तिरिपानो ३४; निकी प्रसाद २/७) पराभूत विरुद्ध भारत: ८.५ षटकांत १ बाद १०४ (शेफाली वर्मा ५५, स्मृती मानधना ४७*; बेलव्हड बिझा १/९) नऊ विकेट्सने.